خوست کې روان کال ۴۶ نوي مخابراتي سايټونه جوړيږي.
د مخابراتو او مالوماتي ټکنالوژۍ وزارت سرپرست نجیبالله حیات حقاني خوست ته د سفر پرمهال ويلي چې د خلکو اړتيا او مخابراتي برخه کې د ستونزو د حل په موخه دغه ولایت کې ۴۶ نوي مخابراتي سايټونه جوړیږي.
هغه ويلي چې دغه سايټونه د خوست ولايتي مسوولانو په غوښتنه او په مخابراتي برخه کې د خلکو د ستونزو حل په موخه جوړيږي.
د خوست ولايت مقام تېره ورځ یوه خبرپاڼه کې ویلي چې د مخابراتو په برخه کې دامهال یاد ولایت کې تر ډېره موثر ګامونه اخیستل شوي خو لا هم ځینې سیمې شته چې خلک یې له مخابراتي خدمتونو محروم دي.
د مسوولانو په وینا، د دغو سایټونو په جوړېدو سره به د خوست ډېری لرې پرتې سيمې له مخابراتي خدمتونو برخمنې شي.
د يادونې ده چې د تېرې پنجشنبې په ورځ د مخابراتو او مالوماتي ټکنالوژۍ وزارت سرپرست پکتيا ته د سفر پر مهال هم ويلي و چې ياد ولايت کې به روان کال ۴۸ نوي مخابراتي سايټونه جوړ شي.
