د متقي او ایران سفیر لیدنه؛ د افغان کډوالو په اېستلو خبرې شوي.
د بهرنیو چارو وزارت سرپرست امیرخان متقي د ایران سفیر علیرضا بیکدلي سره لیدنه کې پر دوه اړخيزو مسایلو په ځانګړې توګه له ایرانه د افغان کډوالو د اېستلو په موضوع خبرې کړي.
د دغه وزارت د ویاند مرستیال ضيا احمد تکل تېره ورځ (پنجشنبه د سرطان ۵مه) ویلي چې دغه لیدنه کې امیرخان متقي له ایرانه په ډلهییزه توګه د افغان کډوالو پر اېستلو اندېښه ښوولې.
هغه د ایران له سفیره غوښتي چې دغه موضوع له لوړ پوړو ایراني چارواکو سره شریکه کړي، څو حسن نیت او يوه منظم میکانیزم ته په پام، د کډوالو ستنول په تدريج ډول ترسره شي او دواړه هېوادونه وکولی شي د ستونزې حل او د هغوی لېږد ته رسېدنه وکړي.
د ایران سفیر هم ډاډ ورکړی چې د کډوالو مسله به خپل دولت سره شریکه او د ستونزې د حل په برخه کې به جدي اقدام وکړي.
امیر خان متقي همدارنګه دغه لیدنه کې د ایران او اسراییل ترمنځ اوربند د سیمې په ګټه بللی او ټينګار يې کړی چې راتلونکې کې هم مسایل داسې مدیریت شي، ترڅو ننګونې زیاتې نه شي.
دا داسې مهال دی چې له ایرانه د راستنېدونکو افغانانو شمېر زیات شوی.
د هرات ځايي چارواکو تېره ورځ وویل چې یوازې د چهارشنبې په ورځ شاوخوا ۳۰ زره افغانان له ایرانه هېواد ته راستانه شوي دي.
د هرات د اطلاعات او فرهنګ رییس او د کډوالو وضعیت ته د رسېدنې کمېسیون د اطلاعاتو او عامه پوهاوي کمېټې مسوول مولوي احمدالله متقي وویل، د کډوالو کمیسیون د بیرته راستنېدونکو لپاره ټول اړین امکانات برابر کړي.
