پکتيا کې د ترافيکي پېښې له امله درې کسان مړه شوي.
د پکتيا امنيه قومنداني مسوولان وايي چې د یاد ولایت مرکز ګردېز ښار اړوند بنوزيو سيمه کې د ترافيکي پېښې پرمهال د يوې مېرمنې په ګډون درېوو کسانو خپل ژوند له لاسه ورکړی دی.
د پکتیا امنیه قومنداني وياند منيب ځدراڼ رسنیو ته وویل چې ياده پېښه بېګاه شپه ۱۱:۳۰ بجې د ګردېز ښار د درېیمې امنیتي حوزې اړوند د بنوزیو د زغني په سیمه کې د خوست –ګردېز پر عمومي لاره رامنځته شوې ده.
هغه دغهراز وويل چې پېښه د یوې سراچه ډوله او باروړونکي موټرو ترمنځ د ټکر له امله رامنځته شوې.
له دې وړاندې هم دغه ولایت کې ورته ټرافیکي پېښې رامنځته شوي چې تر ډېره یې، لامل د موټرچلوونکو بېاحتیاطي او د سړکونو خرابوالی یاد شوی دی.
