احمدشریف چهودري: هند امریکا او پاکستان افغانستان نهدی.
د پاکستان د پوځ ویاند احمدشریف چهودري یو ځل بیا ټينګار کړی چې د هند ورځ تر بلې زیاتېدونکې ولکې ته به غلي نهپاتې کېږي.
چهودري له انادولو خبري شبکې سره د مرکې پرمهال ویلي چې له هند سره تر شخړې وروسته د پاکستان لومړیتوب سوله ده.
نوموړي ویلي: «حقیقت دا دی چې هند نه امریکا ده او پاکستان نه افغانستان دی. هند نه اسراییل دی او پاکستان نه فلسطین دی. موږ به د هند هژموني «ولکې» ته سرټیت نهکړو.»
د هند او پاکستان ترمنځ له شخړې وروسته د امریکا په منځګړیتوب اوربند شوی او دواړه لوري تراوسه دې اوربند ته ژمن پاتې شوې دي.
بلخوا د پاکستان بهرنیو چارو وزیر محمداسحاق دار د دغه هېواد او هند ترمنځ د روان کړکېچ په لړ کې چین ته سفر کوي.
نوموړی به هلته له چینايي چارواکو سره د هند او پاکستان روان کړکېچ او د چین پر دریځ خبرې وکړي.
هند په دغه هېواد کې له خونړي برید وروسته چې پړه یې، پر پاکستان وراچوي، دغه هېواد کې د روانې مې میاشتې پر اوومه د سندور په نوم عملیات وکړل چې وروسته د دواړو لوریو ترمنځ شخړه هم رامنځته شوه.
هند وايي، دې عملیاتو کې یې، د پاکستان له ملاتړ برخمنو وسلهوالو ډلو مرکزونه په نښه کړي او درنه مرګژوبله یې وراړولې ده.
