پروان کې په څه باندې دوو میلیونه افغانیو «دوه کیلومټره» سړک رغول کېږي.
د پروان د کلیو بیارغونې او پراختیا ریاست مسوولان وايي چې دغه ولایت کې د نړیوال بانک په مالي ملاتړ د دوو کیلومټره سړک د جوړېدو چارې پیل شوې.
دغه سړک د «۲۳۴۰۰۰۰» افغانیو په لګښت د یاد ولایت سالنګ ولسوالي کې رغول کېږي.
د پروان د کلیوبیارغونې او پراختیا رییس عبدالصمد صادق نن سهشنبه، چنګاښ لسمه، سلاموطندار ته ویلي چې د یادې پروژې لګښت د نړیوال بانک له لوري ورکول کېږي او چارې یې د اکتید موسسې له لوري پرمخ وړل کېږي.
د نوموړي په وینا، د یاد سړک یوکیلومټر د سالنګ ولسوالي په سبزهيي للمک او یوکیلومټر نور سړک بیا دردهيي بالا سیمه کې رغول کېږي.
د پروان د کلیوبیارغونې او پراختیا رییس د معلوماتو له مخې، د دې پروژې په بشپړېدو سره به ۲۲۹ کورنۍ ګټه واخلي او د سیمې ۱۸۹ کسانو ته به د کارکولو زمینه هم برابره شي.
د یادونې وړ ده چې یاد کلي غرنۍ سیمو کې پراته دي او د دغه سړک په جوړېدو سره به د دې سیمو اوسېدونکي د ولسوالیو له مرکز او د یاد ولایت له مرکزي ښار سره ونښلول شي.
