د اسراییلو لومړی وزیر بنیامین نتنیاهو وايي چې د سوریې پلازمېنې دمشق کې ولسمشرۍ ماڼۍ ته نږدې یې، بمباري کړې ده.
نوموړي ویلي چې دغه برید یې، دمشق کې له «دروزي لږکیو» څخه د ساتنې او له دوی د ملاتړ لپاره کړی دی.
دا په وروستیو ورځو کې دویم ځل دی چې اسراییل د دروزي لږکیو څخه د ساتنې لپاره سوریې کې بریدونه کوي.
سوریه کې دروزي مذهبي د شعیه مذهب یوه څانګه ده چې شاوخوا یو میلیون وګړي یې، په دغه هېواد کې ژوند کوي.
اسراییل وايي، دغه وګړي د سوریې سني مذهبو له لوري له تاوتریخوالي او د مرګ له ګواښ سره مخ دي.
دروزي مذهبي له سوریې سربېره په لبنان، اسراییلو او د جولان په لوړو کې ژوند کوي.
