خوست کې سږ کال په مرکز او ولسوالیو کې په ۱۸ زره او ۵۹۵ هکتاره ځمکه غنم کرل شوي چې څه باندې ۵۰ زره ټنه حاصل یې ورکړی.

د خوست ولايت مقام نن (دوشنبه، جوزا ۲۶) یوه خبرپاڼه کې ویلي، کرنې، اوبو لګولو او مالدارۍ ریاست تر چتر لاندې ۱۹زره او ۲سوه بزګرانو ته د غنمو اصلاح شوي تخمونه او کیمیاوي سرې ویشل شوي چې همدا لامل شوی، ترڅو د غنمو حاصلاتو کې زياتوالی راشي.

يو شمېر بزګران هم وايي، سږ کال يې د غنمو حاصلات د نورو کلونو په پرتله ښه و.

د عليشرو ولسوالي يو تن بزګر عبدالله جان وويل چې د غنمو حاصلاتو زياتوالي لامل يو شمېر بزګرانو ته د اصلاح شويو تخمونو او کيمياوي سرو ورکړه وه.

هغه وويل، سږ کال د غنمو کروندې له طبيعي افتونو خوندي پاتې شوي چې دا هم د حاصلاتو زياتوالي لامل شوی دی.

هغه غوښتنه وکړه چې ټولو بزګرانو ته که اصلاح شوي تخمونه ورکړل شي او لاسنيوی يې وشي، حاصلات به یې نور هم زيات شي.