دریو میاشتو کې طبیعي او غیرطبیعي پېښو کې ۴۲۱ کسانو ژوند بایللی.
د اسلامي امارت مسوولان وايي، د روان ۱۴۰۴ لمریز کال لومړیو دریو میاشتو حمل، ثور او جوزا کې د طبیعي او غیر طبیعي پېښو له امله ۴۲۱ کسانو ژوند بایللی او ۶۱۹ نور ټپیان دي.
پېښو سره د مبارزې د چمتوالي ادارې ویاند محمد یوسف حماد نن (دوشنبه، سرطان ۲۳) سلاموطندار ته وویل، طبیعي او غیر طبیعي پېښو کې د اوښتو ځاني زیانونو ترڅنګ، ۸ زره او ۳۴۵ جریبه کرنیزه ځمکه هم ویجاړه شوې.
هغه وویل چې دغې ادارې د ملي او نړیوالو موسسو په همکارۍ څه باندې ۶۵ زره او ۷۷۴ زیانمنو او اړمنو کورنیو ته خوراکي او غیرخوراکي توکي او نغدې مرستې وېشلي.
د نوموړي په وینا، طبیعي او غیر طبیعي پېښو کې زیانمنو شویو کورنیو ته تر ۲۷۳ میلیون زیاتې افغانۍ وېشل شوي دي.
پېښو سره د مبارزې د چمتوالي ادارې ویاند محمد یوسف همدارنګه وویل چې په ټول هېواد کې اړمنو او زیانمنو کورنیو ته د مرستو وېشلو لړۍ لاهم دوام لري.
