د پاکستان پنجاب کې پر کاغذپرانۍ بندیز؛ پنځه کال بند سزا ټاکل شوې.
د پاکستان د پنجاب ایالتي حکومت په دغه ایالت کې پر «کاغذپرانۍ» یا پتنګ الوزولو باندې بندیز لګولی دی.
د پنجاب اسمبلۍ تېره میاشت په رسمي ډول «پنجاب کې د کاغذپرانۍ الوزولو منع قانون» په نوم قانون تصویب کړ چې پر بنسټ یې، د کاغذپران الوزونکو، تولیدونکو، لېږدونکو او پلورونکو لپاره د بند موده او درنې جریمې پهکې ټاکل شوې دي.
د نوي قانون له مخې، پورتنیو کسانو ته د سرغړونې پرمهال تر پنځو کلونو بند او څه باندې ۷زره ډالر «دوه میلیونه کلدارې» نغدي جریمه ټاکل شوې.
په قانون کې تر ټوله ډېره سزا د کاغذپران جوړونکو او لېږدونکو ته ټاکل شوې چې له پنځه تر اووه کاله بند او له ۵۰۰زره تر پنځه میلیونه کلدارې نغدي جریمه ده.
په قانون کې د کاغذپران د جوړولو او تولید برخه کې پر کارېدونکې هرې وسیلې او توکي هم بندیز لګېدلی دی.
پاکستان کې د رسنیو د راپورونو له مخې، هر کال دغه هېواد کې د پسرلي موسم پرمهال لسګونه کسان د کاغذپرانۍ له امله خپل ژوند له لاسه ورکوي.
