غزه کې درې اسراییلي سرتېري وژل شوي او یو ټپي دی.
د اسراییلو پوځ وايي چې غزه کې د نښتې پرمهال یې، درې سرتېري وژل شوي او یو افسر سخت ټپي دی.
د اسراییلو پوځ په یوې خبرپاڼه کې ویلي چې دغه سرتېري د غزې په شمال کې د حماس له لوري په راکېټ د یوه ټانک د ویشتلو له امله وژل شوي دي.
په دې پېښه کې د اسراییلو د پوځ یو افسر سخت ټپي شوی هم دی.
د اسراییل ټایمز ورځپاڼې نن (سهشنبه، د جولای ۱۵مه) راپور ورکړ چې دا پېښه پرون ماسپښین د غزې په شمال کې د جبالیا په سیمه کې رامنځته شوې ده.
د اسراییلو ټایمز ورځپاڼې د معلوماتو له مخې، غزه کې د اسراییلو بریدونو پیل راهیسې تر دې مهاله ۴۵۴ سرتېري وژل شوي او ګڼشمېر نور ټپیان دي.
د غزې پر بېلابېلو سیمو د اسراییلو په هوايي بریدونو پرون او نن هم ګڼشمېر فلسطینیانو خپل ژوند له لاسه ورکړی او یوشمېر بیا ټپیان شوي دي.
