کابل کې ځانمرګی برید؛ دوه کسان وژل شوي او درې ټپیان دي.
د کور او ښار جوړولو وزارت مخې ته نن پنچشنبه، سلواغې ۲۵مه په شوي ځانمرګي برید کې دوه کسان وژل شوي او پنځه نور ټپیان دي.
د یاد وزارت ویاند محمدکمال افغان رسنیو ته تایید کړه چې برید ځانمرګی دی او بریدګر غوښتل چې دغه وزارت ته ننوځي چې د ساتونکو لهخوا په نښه شوی.
د کور او ښار جوړولو وزارت ویاند همداراز وویل چې پېښه کې درې کسان ټپیان شوي او نور چا ته زیان نهدی اوښتی.
بلخوا د کورنیو چارو وزارت ویاند عبدالمتین قانع له دې وړاندې رسنیو ته منلې وه چې د یاد وزارت مخې ته شوی برید شنډ شوی دی.
د نوموړي په وینا، بریدګر موخې ته له رسېدو وړاندې په نښه او وژل شوی دی. تراوسه د دغه برید مسوولیت کوم چا یا ډلې پر غاړه نهدی اخیستی.
دغه برید داسې مهال کېږي چې روانه اوونۍ په کندوز کې هم د یوه ځانمرګي برید پرمهال پنځه کسانو خپل ژوند له لاسه ورکړی وو.
په هغه برید کې اووه نور کسان بیا ټپیان شوي هم وو. په کندوز کې د شوي ځانمرګي برید مسوولیت داعش ډلې پر غاړه اخیستی.
