د لوګر د پوهنې ریاست مسؤلین وایي، چې د دې ولایت څرخ ولسوالۍ اړوند شش کلا سیمه کې، یوه ښوونځي ته د ودانۍ جوړولو په موخه د یوې علم پاله کورنۍ له لوري په وړیا توګه ځمکه ډالۍ شوه.
د پوهنې ریاست ویاند، محمد شاه پورعرب زینت راډيو ته وویل، چې دغه دولس بسوې شخصي ځمکه، په وړیا توګه د ارواښاد حاجي محمد ابراهیم جمشیدي د کورنۍ له خوا، څرخ ولسوالۍ ته اړوند شش کلا لومړني ښوونځي ته د ودانۍ جوړولو لپاره د پوهنې ریاست ته ډالۍ شوې، چې شاوخوا ۱۲ لکه او ۷۰ زره افغانۍ ارزښت لري.
د عرب په خبره، په وقف شوې ځمکې به په راتلونکي نوي ښوونیز کال کې د پوهنې وزارت له لوري د نوموړي ښوونځي شاوخوا ۵۰۰ زده کوونکو ته د لازم ښوونیز چاپېریال د برابرولو په موخه یوه عصري او مجهزه ودانۍ جوړه شي.
ویل کیږي، چې تېر کال هم یادې کورنۍ په څرخ کې د شش کلا د انجونو ښوونځي ته څه باندې یو جریب، شخصي ځمکه وقف کړې وه.
