له هرات څخه بهر د «پستې» صادرات ۲۰سلنه زیات شوي.
د هرات د سوداګرۍ او صنایعو خونې مسوولان وايي چې دغه ولایت کې د «پستې» صادرات ۲۰سلنه زیات شوي دي.
د یاد ولایت د سوداګرۍ او پانګونې خونې اجراییه امر محمدیوسف امین سلاموطندار ته وايي چې د وروستیو نهو میاشتو پرمهال له دغه ولایت د ۲۴ میلیونه او ۶۷۶زره ډالرو په ارزښت بهر ته پسته صادره شوې.
د نوموړي په وینا، د صادراتو یادې کچې ته په کتو د تېرکال په پرتله ۲۰ سلنه لوړوالی ښيي.
هغه وویل چې تېرکال د ۲۰ میلیونه او ۳۸۲زره ډالرو په ارزښت بهر ته له دغه ولایت پسته صادره شوې.
د یاد ولایت د سوداګرۍ او پانګونې خونې اجراییه امر محمدیوسف امین همداراز ټينګار وکړ چې د وروستیو نهو میاشتو پرمهال د ۱۱۹ میلیونه او ۳۲زره امریکايي ډالرو په ارزښت صادرات شوي دي.
له دغه ولایت بهر ته کرنیز محصولات، وچه مېوه، معدني مواد او زینتي کاڼي شامل دي.
د هرات کشکرباط سنګي، کشککهنه، کهسان، ادرسکن او شینډنډ ولسوالۍ د پستې پر پراخو للمي او اوبیزو ځنګلونو پوښلي دي.
