هند کې د اورښت له امله ۱۴ کسان مړه او ۱۶ ټپیان دي.
هند کې چارواکي وايي چې د یاد هېواد په لوېدیځ ګجرات ایالت کې د باران ورېدو له امله ۱۴ کسان مړه شوي او ۱۶ نور ټپیان دي.
له تېرو دوو ورځو راهیسې دغه ایالت کې د روان باران له امله خلکو ته ګڼ مالي زیانونه هم اوښتي دي.
د هند د هواپېژندنې ادارې په وینا، د ایالت په ډېری برخو کې غیرموسمي باران د پاکستان او هند د راجستان ایالت ورڅېرمه سیمو کې د یوه توپاني څپې له امله رامنځته شوی دی.
یادې ادارې د روانې اوونۍ تر پنجشنبې ورځې په دغه ایالت کې د سختو اورښتونو، تندو بادونو او تالندې وړاندوینه کړې ده.
په ورته مهال د باران له امله ګجرات کې د کرنیزو فصلونو د لهمنځه تلو خبرونه هم ورکړل شوي دي. دغه ایالت د پنبې، وریجو او زیرې لوی تولیدونکی دی.
بلخوا تېره میاشت، په ختیځ او مرکزي هند او د نیپال په ځینو برخو کې بې موسمه اورښتونو له امله څه باندې ۱۰۰ کسان مړه شوي وو.
