بېرته راستنېدونکو ته په ۲۵ ولایتونو کې ۳۵ ښارګوټي جوړېږي.
د سرپرست حکومت چارواکي وايي چې د هېواد په ۲۵ ولایتونو کې له ګاونډیو هېوادونو بېرته راستانه شویو کورنیو ته ۳۵ ښارګوټي جوړېږي.
د سرپرست حکومت د ویاند مرستیال حمدالله فطرت نن یکشنبه، چنګاښ ۲۲مه، ویلي، ټاکل شوې چې دغه ښارګوټي پر ۱۲۰زره جریبه ځمکه ورغول شي.
د نوموړي په وینا، دغه پروګرام به بېرته راستنېدونکو ته د ژوند لومړني شرایط برابر کړي. فطرت زیاته کړه چې د یادو ښارګوټو جوړولو او نورو اسانتیاوو برابرولو لپاره یو میلیارډ افغانۍ ځانګړې شوي چې د سرپرست حکومت له کورنۍ بودیجې ورکول کېږي.
بلخوا د هرات د کهسان ولسوال او اسلامکلا بندر کې د بېرته راستنېدونکو ته د رسېدنې کمېتې مسوول عبدالغني کامل وايي چې یاد بندر کې بنسټییزې پروژې پلې شوې دي.
دا په داسې حال کې ده چې په دې وروستیو اوونیو کې له ایران څخه د افغان کډوالو د راستنیدو بهیر ګړندی شوی چې هره ورځ زرګونه کسان د اسلامکلا له لارې هېواد ته داخلیږي.
