له یمن پر اسراییلو توغندیز برید شوی.
د اسراییلو چارواکي وايي چې له یمن څخه د دوی پر مرکزي سیمو وېشتل شوی توغندی یې، شنډ کړی دی.
دغه توغندی نن پنجشنبه، مې ۲۲مه، سهار مهال له یمن توغول شوی دی.
د اسراییلو پوځ په دې اړه نور جزییات نهدي ورکړي.
دا په روانه میاشت کې له یمن پر اسراییلو څلورم توغندیز برید دی چې کېږي. د یادو توغندیزو بریدونو ډېری مسوولیت د حوثیانو ډله پر غاړه اخلي.
تېره اوونۍ د دوشنبې او پنجشنبې پر ورځو هم حوثیانو پر اسراییلو توغندیز بریدونه کړي و چې د اسراییلو په وینا، شنډ شوي دي.
همداراز د روانې میاشتې په لومړیو کې د اسراییلو بېنګوریون هوايي ډګر مخته د یوه توغندي د لګېدو له کبله، یوشمېر کسان ټپیان شول او د یاد هوايي ډګر الوتنې وځنډول شوې.
حوثیان وايي چې غزه کې د فلسطینیانو په ملاتړ، پر اسراییلو توغندیز بریدونه کوي او په وینا یې، تر هغو به روان وي چې اسراییلو جګړه نهوي درولي.
