میدانوردګ کې په ۲۰۰ میلیونه ډالرو د اوسپنې ویلېکولو کارخونه جوړېږي.
د میدانوردګ محلي مسوولان وايي چې د دغه ولایت په مرکز میدانښار کې د هندي بانګوالو له لوري د اوسپنې ویلېکولو کارونه جوړېږي.
د یاد ولایت له مقام څخه رسنیو ته په رالېږل شوې خبرپاڼه کې ویل شوي چې تېره ورځ په دې اړه هندي پانګوالو د میدانوردګ والي قاري بختیار معاذ سره په خپل دفتر کې لیدلي دي.
د ورکړل شویو معلوماتو له مخې، یاده فابریکه د مرکز میدانښار په «کوټه عشرو» سیمه کې د ۲۰۰ میلیونه امریکایي ډالرو په ارزښت جوړیږي چې په منځیني ډول به هره ورځ ۱۲۵۰ ټنه اوسپنه تولیدوي او زرګونه کسانو ته به پهکې د کارکولو زمینه برابره شي.
خبرپاڼه زیاتوي، د میدانوردګ والي قاري بختیار معاذ هندي پانګوالو ته ډاډ ورکړی چې ولایتي اداره به د یادې فابریکې په جوړیدو کې ورسره هر اړخیزه همکاري وکړي.
نوموړي همدارنګه په نورو پانګوالو هم غږ وکړ چې په میدان وردګ ولایت کې پانګونه وکړي او د پخوا په پرتله اوس مهال د هیواد په ټولو سیمو کې امنیت خوندي شوی او د پانګونې لپاره پراخ فرصتونه رامنځته شوې دي.
