BMW خپل نوي ماډل موټر کې ډيپسیک مصنوعي ځیرکتیا کاروي.
د جرمني د موټرو جوړولو نړیوال شرکت «BMW» وايي چې د روان کال په پای کې به خپل نوي ماډل موټرو کې د مصنوعي ځیرکتیا له ډيپسیک څخه ګټه واخلي.
د یاد شرکت اجراییه مشر اولېور زېپس د شانګهای موټرو نړیوال نندارتون کې ویلي چې خپل نوي تولیدونکي ماډل موټر کې به د ډیپسیک مصنوعي ځیرکتیا څخه ګټه واخلي او په وینا یې، په دې تړاو یې، خپلې هڅې پیل کړي. دي.
نوموړي وویل: «د مصنوعي ځیرکتیا برخه کې دلته د پام وړ پرمختګونه روان دي. موږ په خپل نوي ماډل موټرو کې د مصنوعي ځیرکتیا د یوځای کېدو برخه کې د همکاریو پیاوړتیا په لټه کې یوو. د روان کال وروستیو کې به ډيپسیک مصنوعي ځیرکتیا خپلو نویو موټرو کې ادغام کړو.»
بياېم ډبلیو د نړۍ په ۱۴۰ هېوادونو کې د خرڅلاو څانګې او د موټرو ترڅنګ د موټرسایکلونو د تولید ۳۰ تولیدي څانګې لري چې څه باندې ۱۵۹زره کارکوونکي ورسره کار کوي.
دغه شرکت ۲۰۲۴کال کې ۲.۴۵ میلیونه مسافروړونکي موټر پلورلي دي.
