غزه کې لوږې په یوه ورځ ۱۵ کسان مړه کړي.
غزه کې د لوږې له امله تازه ۱۵ کسان مړه شوي چې د اسراییلو له جګړې راهیسې هلته د لوږې او قحطۍ له امله د مړو شویو شمېر ۱۰۱ ته ورسېد.
یوشمېر رسنیو نن (چهارشنبه، اسد لومړۍ) راپور ورکړی چې د لوږې له امله دغو مړو شویو ۱۵ فلسطینیانو کې څلور ماشومان هم شامل دي.
د غزې روغتیايي چارواکو تېره ورځ سهشنبه داسې مهال د دغو کسانو د مړو کېدو اعلان وکړ چې اسراییلي ځواکونو پر غزې بمبار او بریدونو ته دوام ورکړی.
د اسراییلي ځواکونو وروستیو بریدونو کې لږ تر لږه ۸۱ کسان وژل شوي او ګڼ شمېر نور ټپیان شوي دي.
ورته وخت کې د ملګرو ملتونو سازمان غزه کې وضعیت مرګونی او وحشتناکه بللی او هرڅه ژر یې د اوربند د ټینګښت او د اسراییل له لوري د غزې د محاصرې پایته رسولو غوښتنه کړې ده.
د یادونې ده چې اسلامي امارت دوه ورځې وړاندې له ټولو مسلمانو هېوادونو او نورو لوریو وغوښتل چې هرڅه ژر د غزې مظلومو ماشومانو او ښځو ته د بشري مرستو د رسیدو لپاره لاره هواره کړي او هلته روان ظلم او زیاتی پایته ورسوي.
