پر غزې مرګوني بریدونه؛ اسراییلو یوازې نن ۱۶ فلسطینیان وژلي.
له نن سهار راهیسې د غزې په بېلابېلو سیمو کې د اسراییلي ځواکونو د بریدونو له امله ۱۶ فلسطینیانو خپل ژوند له لاسه ورکړی دی.
دغه بریدونه ساعت وروسته له هغې کېږي چې اسراییلي جېټالوتکو پر نصیر روغتون برید وکړ او د حماس د یوه سیاسي مشر په ګډون پهکې دوه کسان ووژل شول.
د حماس مشر اسماعیل برهوم په دغه برید کې ژوند له لاسه ورکړی. له دې وړاندې تېره ورځ د اسراییلو په یوه بل برید کې هم د حماس یوه سیاسي مشر ژوند بایللی و.
له دې سربېره د غزې په بېلابېلو سیمو کې میلیونونه کسان له لوږې سره مخ دي او د بشري مرستو لېږد هم د اسراییلو بریدونو له کبله له خنډ سره مخ شوی دی.
له مرستو بار ولاړو لاریو ته تر ډېره د تګ اجازه نهورکول کېږي او له غزې بهر ولاړې دي.
همداراز د غزې اوسېدونکي له روغتیايي خدمتونو سربېره، د ژوند لومړنیو خدمتونو ته لاسرسی نهلري چې دې چارې د زرګونه کسانو ژوند له ګواښ سره مخ کړی دی.
بلخوا اسراییلي جېټالوتکې د بېځایه شویو د اوسېدو ځایونو سربېره، روغتونونه او د عامه خدمتونو وړاندې کولو مرکزونه وران کړي او هغه چې پاتې، خدمتونه یې، په نشت حساب دي.
