په کابل کې د ایران سفارت وایي، د افغانستان- ایران- اروپا د وسپنې پټلۍ دهلېز فعال شوی او د افغانستان لومړنۍ صادراتي جوپه د دغه دهلېز له لارې ترکیې ته استول شوې څو اروپا ته ورسول شي. د ایران سفارت په یوه خبرپاڼه کې ویلي، د ایران په همکارۍ د دغه دهلېز فعالول، کولی شي د افغانستان اقتصادي ودې ته لاره هواره کړي. په هرات کې د ایران سر کونسل، د هرات والي او یو شمېر نورو سیمه‌ییزو مسوولینو د دغه دهلېز له لارې د صادراتو د پیل مراسمو کې ګډون کړی و.