د راپورونو له مخې، ایران او اسرائیلو تېره شپه یو ځل بیا پر یوه او بل بریدونه کړي، قطر او برېتانیا د تاوتریخوالي کمېدو پر اړتیا ټينګار کړی او د جګړې یو شمېر مخالفو فعالانو د امریکا د سپینې ماڼۍ مخې ته او لاس‌انجلس ښار کې احتجاجونه کړي دي.

اسرائیلو د تېرې جمعې په سهار د ایران پر ځینو تاسیساتو او سیمو هوايي بریدونه وکړل، وروسته بیا ایران هم پر اسرائیلو د ځوابي بریدونو لړۍ پیل کړه، تر اوسه دواړه لوري پر یو بل بریدونه کوي؛ په بریدونو کې دواړو لورو ته مالي زیانونه او ځاني تلفات اوښتي خو کره شمېر یې معلومه نه ده.

نن د ایران او اسرائیلو د جګړې اوومه ورځ ده خو لا هم بریدونه نه دي درېدلي، رویټرز راپور ورکړی چې ایران او اسرائیلو تېره شپه پر یو بل تازه بریدونه کړي دي.

د راپورونو له مخې، ایران بېګا شپه د لومړي ځل لپاره پر اسرائیلو د برید پر مهال د ۲۰۰۰ کیلومتره واټن ویشتونکو «سجیل» توغندیو کار اخیستی دی.

دغه توغندی د سپاه پاسداران له ‌خوا د «وعده صادق ۳» عملیاتو په دوولسمه څپه کې د اسرائیلو پر لور توغول شوی دی.

دغه راز، د برېتانیا د لومړي وزیر دفتر یوه ویاند ویلي، لومړي وزیر کیير سټارمر د قطر له امیر شیخ تمیم بن حمد ال‌ثاني سره د ټیلېفون اړیکې له لارې په منځني ختیځ کې پر وروستیو پېښو غږېدلی دی.

دواړو مشرانو د ډیپلوماسۍ فعالیتونو زیاتېدو او تاوتریخوالي کمېدو پر اړتیا ټینګار کړی دی.

بي‌بي‌سي لیکلي، د جګړې یو شمېر مخالفو فعالانو په واشنګټن کې د سپینې ماڼۍ مخې ته او دغه راز په لاس‌انجلس ښار کې له شعارونو سره یوځای احتجاجونه کړي دي.

دا په داسې حال کې ده چې د ملګرو ملتونو امنیت شورا سبا په سیمه کې د روان کړکېچ په اړه بله بېړنۍ غونډه کوي.