د مولوي عبدالکبیر او د قطر شارژدافیر لیدنه؛ راستنېدونکو سره د مرستو په ډېرولو خبرې شوي.
کابل کې د قطر سفارت یوه خبرپاڼه کې ویلي چې د دغه سفارت شارژدافیر میردف بنعلي القاشوطي د اسلامي امارت د کډوالو او بېرته راستنېدونکو چارو وزارت سرپرست مولوي عبدالکبیر سره لیدلي.
خبرپاڼه کې ویل شوي چې دې کتنه کې د دواړو هېوادونو ترمنځ د همکاریو پر پراختیا او د بېرته راستنېدونکو کډوالو د ملاتړ او د مرستو ډېروالي پر لارو چارو خبرې شوي.
کابل کې د قطر سفارت داسې مهال بېرته راستنېدونکو کډوالو سره د مرستو زیاتولو ډاډ ورکړی چې دامهال له پاکستانه په جبري توګه د افغان کډوالو د بېرته راستنېدنې لړۍ دوام لري او په تېرو څو ورځو کې تر زرګونه کډوال هېواد ته راستانه شوي دي.
ورته وخت کې د اسلامي امارت سرپرست حکومت هم د بېرته راستنېدونکو کډوالو لپاره د سرپناه برابرولو برخه کې د پوره چمتووالي خبر ورکړی او له نړیوالو مرستندویه بنسټونو یې غوښتي چې کډوالو سره هر اړخیزې مرستې وکړي.
پاکستان د ۲۰۲۵ کال د روانې اپرېل مياشتې له لومړۍ نېټې له دغه هېواده د افغان کډوالو د ايستلو بهیر پېل کړ.
اسلامي امارت په دې اړه څو ځلې پاکستاني لوري سره خبرې کړي چې ظاهرا یې کومه پایله نهده ورکړې او هغوی د کډوالو د ایستلو بهیر روان ساتلی دی.
