غزه کې بریدونه؛ ۱۸ کسانو خپل ژوند له لاسه ورکړی.
د غزې پر بېلابېلو سیمو د اسراییلو په هوايي او روانو ځمکنو عملیاتو کې د ښځو او ماشومانو په ګډون ۱۸ کسانو خپل ژوند له لاسه ورکړی دی.
د دوو ماشومانو او دوو مېرمنو په ګډون، دغه کسان د غزې په خانیونس کې د اسراییلو له لوري په نښه شوي دي.
غزه کې د روغتیا وزارت چارواکي وايي چې د اسراییلو د بریدونو پیل راهیسې تر دې مهاله څه باندې ۵۱زره فلسطینیانو خپل ژوند له لاسه ورکړی او څه باندې ۱۰۰زره نور ټپیان دي.
همداراز د غزې دولتي رسنیز دفتر بیا اعلان کړی چې د روانې جګړې له امله څه باندې ۶۱۷۰۰ کسان د ویجاړو شویو ودانیو او ډبرو لاندې ورک دي.
د روانې جګړې له امله زرګونه کورنۍ له خپلو مېنو او سیمو بېځایه شوي او د بېځایه شویو په کمپونو کې تر خېمو لاندې د اسراییلو د بریدونو تر وېرې لاندې ژوند کوي.
د کلابندۍ له امله زرګونه کسان په ځانګړې توګه ماشومان له لوږې او خوارځواکۍ سره مخ دي او مېشت مرستندویه بنسټونه د بېړنیو مرستو غوښتنې لري.
