پر پاکستان د هند توغندیز بریدونه؛ ۸پاکستانیان وژل شوي او ۳۵ ټپیان دي.
د هند پوځ د “سندور” په نوم عملیات پیل کړي چې پاکستان او د دغه هېواد تر ولکې لاندې کشمیر کې یې ٩ سیمې په نښه کړي دي.
د راپورونو پر اساس، دغو توغندیو بریدونو کې تردامهاله لږ تر لږه ٨ پاکستانیان وژل شوي او تر ۳۵ ډېر ټپیان دي.
بلخوا پاکستاني پوځ له هند څخه د “جګړې عمل” ته د قوي ځواب ورکولو ژمنه کړې ده.
ورته وخت کې د پاکستان د «بهاولپور» سیمې د روغتون یوه ډاکټر اسوشیټېډ پرېس اژانس ویلي، د تېرې شپې د برید له ځایه ورته ۱۳ جسدونه ور وړل شوي دي.
اسوشیتید پرس راپور ورکړی چې له دې سره د ټولو توغندیزو بریدونو له امله د تلفاتو شمېر ۱۹ ته رسېدلی دی.
د تېرې اپرېل پر ۲۲ د هند تر ولکې لاندې د کشمیر په پهلګام کې پر سیلانیانو له برید وروسته چې هند یې پړه پر پاکستان واچوله، د دواړو اټمي وسلو لرونکو هېوادونو ترمنځ کړکېچ زیات شوی دی.
