روسی سرتېری اوکراین ته د تسلیمېدو له امله په ۱۵ کاله بند محکوم شوی.
د روسیې پوځي محکمې د دغه هېواد یو سرتېری له جګړې د تېښتې او اوکراین ته په خپله خوښه د تسلیمېدو له امله په ۱۵ کاله بند محکوم کړی دی.
روسیې همداراز پنځه نور کسان چې عمرونه یې، له شلو ښکته دي، د چورلکې او اوسپنې پټلۍ تجهیزاتو ته د اوراچولو په تور د بند سزا ورکړې ده.
پر دوی تور دی چې د اوکراین په پلوي یې، دغه کار کړی دی.
په ورته مهال د روسیې کرسک کې د اورکراین د بېپېلوټه الوتکو برید کې یو کس وژل شوی او پنځه نور ټپیان دي. برید کې دوه کورونه او ۱۵ موټر هم ویجاړ شوي دي.
بلخوا د روسیې دفاع وزارت وايي چې بېګاه شپه د اوکراین ۱۱۵ ډرون راغورځولي دي.
اوکراین همداراز ادعا کړې چې د روسي پوځیانو هغه مرکز یې، په نښه کړی چې سومي ښار کې یې، د توغندیز برید له امله ۳۴ کسان وژلي وو. اوکراین زیاته کړې چې د روسیې لسګونه ډرون بریدونه یې هم شنډ کړي دي.
