د اسلامي امارت او ترکمنستان چارواکو د ټاپي پروژې د چارو پر چټکتیا ټینګار کړی.
د کانونو او پترولیم وزارت پر اېکسپاڼه لیکلي چې د دغه وزارت سرپرست هدایت الله بدري، د هرات والي نوراحمد اسلامجار، د افغانستان لپاره د ترکمنستان سفیر خواجه عوضوف، د ټاپي نللیکې کمپنۍ اجراییوي رئیس مراد امانوف او نورو مسوولانو هرات کې د ټاپي ګازو نللیکې پروژې له رغنیزو چارو لیدنه کړې.
دواړو لوریو د ټاپي پروژې د پرمختګ په اړه خوښي څرګنده کړې او د دغې پروژې د چارو پر چټکتیا یې ټینګار کړی دی.
د افغانستان په خاوره کې دامهال د ټاپي پروژې شاوخوا ۱۲ کیلومتره نللیکه غځول شوې او د څه باندې ۲۰ کیلومترو په اوږدوالي د نللیکې سیمه هواره شوې ده.
ټاکل شوې چې د ټاپي پروژې د چارو چټکتیا په موخه راتلونکو ورځو کې، هممهاله په څو سیمو کې کارونه پیل شي.
ټاپي پروژه ګډه سیمهييزه پروژه ده چې په پلي کېدو سره یې د ترکمنستان ګاز د افغانستان له لارې پاکستان او هند ته لېږدول کېږي. دا پروژه ټولټال ۱۸۱۴ کیلومټره اوږدوالی لري چې ۲۰۷ کیلومټره یې د ترکمنستان، ۷۷۴ کیلومټره د افغانستان او ۸۲۶ کیلومټره یې هم د پاکستان له خاورې تېرېږي او د هند تر پولې پورې دوام کوي.
