کاپیسا او پنجشېر کې سېلابونه؛ یو کس مړ او کروندګرو ته زیان اوښتی.
په کاپیسا او پنجشېر کې د اورښونو له امله راوتلیو سېلابونو پرمهال یوه کس خپل ژوند له لاسه ورکړی او ګڼ مالي زیانونه یې، اړولي دي.
د کاپیسا د نجراب ولسوال عطالله نعمت وايي چې د یادې ولسوالي په بېلابېلو سیمو کې سېلابونه راوتلي چې له امله یې، یو کس خپل ژوند له لاسه ورکړی دی.
سېلابونه پرون یکشنبه، چنګاښ ۲۲مه راوتلي دي. د نوموړي په وینا، د نجراب ولسوالي د ویشار کلي ۲۲کلنه شفیقه د سېلاب له امله مړه شوې ده.
بلخوا د پنجشېر په رخه ولسوالي کې د سختو اورښتونو له کبله سېلابونه راوتلي چې په پایله کې یې، څو کورونه ویجاړ شوي او کروندګرو ته هم زیان اوښتی دی.
د پنجشېر د پېښو پر وړاندې د مبارزې رییس محبالله جاهد وايي چې یاده ولسوالي کې سېلابونو درې کورونه ویجاړ کړي او اووه نور کورونه په نیمه توګه ویجاړ شوي دي.
د جاهد په وینا، د سېلابونو له امله دوه هټۍ، یو ښوونځی، لسګونه جریبه کرنیزه ځمکه، د اوبو شپږ کانالونه او د اوبو رسولو دوه شبکې ویجاړ شوې دي.
