کندهار کې زرګونه بزګرانو ته د غنمو اصلاح شوی تخم او کیمیاوې سره وېشل شوې.
د کندهار کرنې، اوبولګولو او مالدارۍ ریاست مسوولان وايي چې د یاد ولایت شاوليکوټ ولسوالي کې زرګونه بزګرانو ته د غنمو اصلاح شوی تخم او کیمیاوې سره وېشل شوې.
اصلاح شوی تخم او کیمیاوې سره د ملګروملتونو د خوړو او کرنې نړیوال سازمان په مالي ملاتړ، پر بزګرانو وېشل شوی دی.
د کندهار کرنې ریاست ویاند محمدحنیف حقمل وايي، د دې مرستې لپاره څه باندې دوه میاشتې وړاندې د کرنې او مالدارۍ ریاست او نورو ادارو په همکاري، د نوملیکنې بهیر بشپړ شوی وو.
د ویش په پایله کې هر بزګر ته ۵۰ کیلو غنمو اصلاح شوی تخم، ۵۰ کیلو سپینه سره او ۵۰ کیلو توره سره ورکړل شوه. د دې مرستې موخه د بزګرانو د کرنیزو حاصلاتو لوړول او له کمې ځمکې څخه د زیات حاصل ترلاسه کول دي.
د اصلاح شویو تخمونو او کیمیاوې سرې وېش سره، تمه کېږي چې د غنمو حاصلاتو کچه لوړه شي او بزګران خپلې اقتصادي اړتیاوې برابرې کړي.
یوه اوونۍ وړاندې د کندهار زېړۍ ولسوالي کې هم ۱۳۰۰ اړمنو بزګرانو ته ورته مرسته ویشل شوې وې.
