پر اوکراین د روسیې بریدونه؛ ۱۴ کسان ټپیان دي.
د اوکراین چارواکي وايي چې روسیې بېګاه شپه د یاد هېواد پر کېیف او نورو سیمو پراخ بریدونه کړي چې له کبله یې، ۱۴ کسان ټپیان شوي دي.
د کېیف ښاروال ویټالي کلیچکو نن جمعه، جولای څلورمه، پر خپل ټېلېګرام لیکلي چې د روسیې په بریدونو کې دولس ټپیان روغتون کې بستر شوي.
د کلیچکو په وینا، د بریدونو له امله د اوسپنې پټلۍ بنسټونو ته زیان اوښتی او ګڼشمېر موټرسوځېدلې دي.
د نړیوالو رسنیو د راپورونو له مخې، پر اوکراین د روسیې هوايي بریدونه د وروستیو اوونیو پرمهال پراخ شوي دي.
دا په داسې مهال دی چې د اوکراین جګړې پای ته رسولو لپاره د امریکا هڅو تراوسه کومه پایله نهده ورکړې.
بلخوا امریکا اوکراین ته د یوشمېر وسلو لېږد هم درولی، هغه څه چې د اوکرایني چارواکو په وینا، د روسیې هوايي او ځمکنیو بریدونو پر وړاندې د کېیف دفاع کمزورولی شي.
