د غزې محاصره؛ تر سلو ډېر نوي زېږېدلي ماشومان خطر سره مخ دي.
د اسراییل له لوري د غزې محاصرې په دلیل، هلته د روغتونونو امکانات مخ په ختمېدو دي چې له امله یې تر سلو ډېر نوي زېږېدلي ماشومان د مرګ خطر سره مخ دي.
د راپورونو پر اساس، غزه کې د روغتونونو مسوولانو د مرستو غوښتنه کړې او خبرداری یې ورکړی چې د اسراییل له لوري محاصره به ډېر ژر د درملنې مرکزونه په هدیرو بدل کړي
د غزې په شمال کې د «الشفاء» او سویل کې د «ناصر» روغتون مسوولانو د چهارشنبې په ورځ وویل، د سوند توکي یې مخ په ختمېدو دي او د ناروغانو په ځانګړې توګه د نویو زېږېدلو ماشومانو د درملنې توان نهلري.
غزه کې د درملنې تر ټولو د ستر روغتون الشفاء مسوول ابو سلمیه وویل، دغه روغتون کې تر سلو د ډېرو بېوخته زېږېدلو ماشومانو او د ۳۵۰ دیالیز ناروغانو ژوند د مرګ له خطر سره مخ دی.
هغه وویل: «د اکسیجن ډبې له له کاره ولویږي، کوم روغتون چې اکسیجن ونهلري، هغه روغتون نه دی، د وینې بانک او لابراتوار به فعالیت ودرول شي او وینې به یخچالونو کې خرابې شي.»
د هغه په وینا چې روغتون به نور د درملنې مرکز نهوي، بلکې د خلکو لپاره به په هدیرې بدل شي.
د غزې سویل ته خان یونس ښار کې هم د «ناصر» طبي کمپلیکس مسوولان وايي چې دغه روغتون د تیلو کمښت سره مخ دی.
دغه روغتون یوه بیانیه کې ویلي چې د سوند توکي نور ختم شوي او ډاکټران د انسانانو د ژوند ژغورلو لپاره د وخت، مرګ او تیارو پر وړاندې مبارزې ته داخل شوي.
اعلامیه کې ویل شوي چې: «د ډاکټرانو ټیم تر وروستۍ شېبې جنګیږي. مخکې له دې چې د ناصر روغتون د ناروغانو لپاره په هدیرې بدل شي، هغه وژغورئ.»
دا داسې مهال دی چې اسراییلي ځواکونو د غزې پر بېلا بېلو سیمو هوايي او ځمکنیو بریدونو ته دوام ورکړی او تېره ورځ یې ۷۴ فلسطینیان وژلي او ګڼ شمېر نور ټپیان کړي دي.
