بلخ کې یوه سوداګر په دوو میلیونو ډالرو «د اوبو پارک» جوړ کړی.
د بلخ د بدني روزنې او ورزش ریاست مسوولان وايي چې دغه ولایت کې یوه سوداګر د دوو میلیونه ډالرو په لګښت د اوبو پارک جوړ کړی دی.
د یاد ریاست د معلوماتو له مخې، دغه پارک پر یو جریب ځمکه جوړ شوی او تېره ورځ ګټېاخیستنې ته سپارل شوی دی.
د یاد پارک مسوول محمدرضا جمالي وايي چې دغه پارک د مزارشریف اوسېدونکو د تفرېح او ورزش لپاره جوړ شوی دی.
د نوموړي په وینا، مزارشریف کې جوړ شوی د اوبو دغه پارک لومړنۍ نړیوال پارک دی چې پر معیاري او مجهزو وسایلو سمبال دی.
هغه زیاته کړه چې دې پارک کې وچ او بخار جکوزي، سړې اوبه، د مالکې ځای، درملیزې اوبه او نورې برخې هم لري.
د اوبو دغه پارک په څلورو پوړونو کې جوړ شوی دی.
د یاد پارک مسوولان همداراز ډاډ ورکوي چې د لامبو وهلو پرمهال د خوندیتابه او روغتیا اړوند ټول وسایل شتون لري او په دې تړاو ټولې سپارښتنې به رعایت کېږي.
