اسټرالیا د افغان ښځو او نجونو د ملاتړ لپاره ۵ میلیون ډالره مرسته کوي.
د اسټرالیا بهرنیو چارو وزارت یوه خبرپاڼه کې ویلي، دغه هېواد د افغان ښځو او نجونو د ملاتړ لپاره ۵ میلیون ډالر ځانګړي کړي دي.
د اسټرالیا د بهرنیو چارو وزیرې پیني وانګ ټینګار کړی چې هېواد یې د افغان ښځو او نجونو د حقونو ملاتړ کوي.
خبرپاڼه کې راغلي چې: «۵ میلیون نور ډالر هم ملګرو ملتونو ته ځانګړي کیږي، څو افغان ښځو او نجونو ته په بېلابېلو برخو کې د بېړنیو اړتیاو سره سم خدمتونه وړاندې کړي.
تر دې وړاندې یوشمېر نورو هېوادونو هم د افغان ښځو د ملاتړ لپاره میلیونونه ډالره مرسته کړې ده.
دا داسې مهال ده چې د ملګروملتونو اړوندو ادارو ویلي چې په روان زېږدیز کال کې نږدې ۲۴ میلیون افغانان چې ۱۲ میلیون او ۳۰۰ زره یې ماشومان دي، بشردوستانه مرستو ته اړتیا لري.
