هند او اسټرالیا نن د چمپینزټرافي نیمه پایلوبه کوي.
د پاکستان او عربي متحده اماراتو په کوربهتوب د چمپینزټرافي یا اتلانو جام نیمه پایلوبه کې د هند او اسټرالیا کرېکټ ملي لوبډلې نن سهشنبه، مارچ څلورمه په نیمه پایلوبه کې لوبېږي.
ټاکل شوې چې یاده لوبه نن ماسپښین ۱:۳۰ بجې د عربي متحده اماراتو په دوبۍ نړیوال لوبغالي کې پیل شي.
هند له اې ګروپ څخه د لومړۍ لوبډلې په توګه نیمه پایلوبې ته لاره پیدا کړې او دغه ګروپ کې یې، ټولې سیالي ګټلې دي.
اسټرالیا بیا د اتلانو جام په بي ګروپ کې یوازې یوه لوبه ګټلې او دوه سیالي یې، د باران له امله لغوه شوې دي. اسټرالیا د ګروپ دویمې لوبډلې په توګه په څلور امتیازونو نیمه پایلوبې ته ووتله.
د هند او اسټرالیا ترمنځ له دې وړاندې په شویو وروستیو پنځو یو ورځنیو نړیوالو لوبو کې درې ځلې هند او دوه ځلې اسټرالیا بریاوې خپلې کړې دي.
هند او اسټرالیا د ۲۰۲۳ کال یو ورځنیو سیالیو نړیوال جام پایلوبې ته هم وتلې وې چې استرالیا لوبډلې پکې بریا خپله کړې وه.
