میدانوردګ کې د معلولانو او شهیدانو کورنیو ته ۳۸۰میلیونه افغانۍ ورکړل شوي.
د میدانوردګ محلي مسوولان وايي چې د دغه ولایت په مرکز میدانښار او نهه ولسوالیو کې پر شاوخوا لس زره معلولانو او د شهیدانو پر کورنیو ۳۸۰ میلیونه افغانۍ وېشل شوي دي.
د دغه ولایت د شهیدانو او معلولانو چارو ریاست ریيس مولوي نذیر ابومحمد میدانښار کې خبریالانو ته وویل، د ولایت په کچه یې لس زره معلولانو او د شهیدانو کورنیو سره د تېر یوه کال میاشتني حق شاوخوا ۳۸۰ میلیونه افغانۍ وېشلې دي.
ده وویل، په یادو کورنیو کې ۳۲۵۱ د معلولانو کورنۍ، ۵۹۹۰ وفات شوي ملکي شهیدانو او پاتې یې د تېر نظام او اسلامي امارت د شهیدو شویو سرتېرو کورنۍ شاملې دي.
ابومحمد وویل، په تېر یوه کال کې یې د بېلابېلو موسسو له لوري د شاوخوا ۱۱ میلیونه افغانیو په ارزښت د دغه ولایت له معلولانو او شهیدانو کورنیو سره نغدي مرسته هم کړې ده.
هېره دي نه وي چې له دې وړاندې د میدانوردګ په ګډون د هېواد په یوشمېر ولایتونو کې معلولانو او د شهیدانو کورنیو شکایت کړی وو چې دوی ته په خپل وخت میاشتنی حق نه ورکول کېږي.
