پکتـیا کې لېوه د یوې کورنۍ پنځه غړي داړلي.
د پکتيا امنيه قومنداني مسوولان وايي چې د ډنډپټان ولسوالي حسنخېلو کلي کې لېوه د يوې کورنۍ پنځه غړي داړلي دي.
پېښه نن چهارشنبه، سلواغې ۱۷مه، سهار ۵بجې رامنځته شوې.
د پکتيا امنيه قومنداني وياند منيب ځدراڼ وايي، دغه لېوه له غره څخه یوه کلي ته راښکته شوی او د درېو مېرمنو په ګډون یې، د يوې کورنۍ پنځه غړي داړلي دي.
منيب ځدراڼ زیاته کړه چې د ولسوالي امنـیتي ځواکونه پېښې ځای ته رسېدلي او ټپیان یې، د څمکنـیو ولسـوالي روغـتون ته لېږدولي دي.
ټپیانو کې د دوو روغتیايي وضعیت د اندېښنې وړ ښودل شوی او د پکتیا حوزوي روغتون ته لېږدول شوي دي.
لېوه د یادې کورنۍ د نورو غړیو له لوري وژل شوی دی.
تېرکال هم د ژمي په موسم کې په ډنډپټان او اريوب ځاځي ولسوالي کې لېوانو نهو کسان داړلي وو.
