عبدالباری عمر، رییس‌ اجرایی شرکت برق‌رسانی افغانستان (برشنا)، با دلیر جمعه، وزیر انرژی تاجیکستان در مورد انتقال انرژی، هم‌کاری‌‎های اقتصادی و پیش‌رفت‌های پروژه‌ی کاسا-هزار گفت‌وگو کرده است.

شرکت برق‌رسانی افغانستان، امروز (پنج‌شنبه، ۲۵ ثور)، در اعلامیه‌ای نوشته که وزیر انرژی تاجیکستان در این دیدار، نسبت به گسترش هم‌کاری‌های دوجانبه در زمینه‌های انتقال انرژی، ثبات منطقه‌ای و امنیت ابراز خرسندی کرده است.

عبدالباری عمر نیز، با اشاره به ارزش‌ها و منافع مشترک میان افغانستان و تاجیکستان، گفته که امارت اسلامی خواهان تقویت روابط اقتصادی و سیاسی با همه‌ی کشورها به ویژه‌ کشورهای اسلامی همسایه است.

بر اساس اعلامیه‌ی برشنا، در این نشست دو طرف متعهد به تقویت هم‌کاری‌ها برای ارتقای ثبات و توسعه‌ی پایدار در بخش انرژی شده اند.

روز گذشته، هیئتی از شرکت برق‌رسانی افغانستان به رهبری آقای عمر، به هدف شرکت در نشست مربوط به پروژه‌ی کاسا-هزار به تاجیکستان رفت.