مسعود پزشکیان: ایران به هېڅکله د امریکا ځورونو ته سر ټیټ نهکړي.
د منځني ختیځ یوشمېر هېوادونو ته د سفر پرمهال د ایران په تړاو د امریکا ولسمشر ډونالډ ټرمپ څرګندونو ته په غبرګون کې د دغه هېواد ولسمشر مسعود پزشکیان ویلي چې ایران به هېڅکله د ټرمپ ځورونو او نیوکو ته سرټیټ نهکړي.
نوموړي په یوې وینا کې چې د ایران له دولتي تلوېزیون په ژوندۍ بڼه خپرېده، وویل: « نوموړی «ټرمپ» فکر کوي چې کولای شي، دلته راشي او موږ وډار کړي. موږ ته د خوب په بستر کې د مړینې په پرتله شهادت څو برابره خوږ دی. تاسو راغلي یاست چې موږ وډار کړئ؟ موږ به د هر ډول ځورونې پروړاندې سر ټیټ نهکړو.»
د امریکا ولسمشر منځني ختیځ ته د خپل سفر پرمهال له ایران غوښتنه وکړه چې له ترهګرو ملاتړ او نیابتي جګړې ودري او په وینا یې، د خپل اټومي وسلو له پروګرام دې لاس واخلي.
ټرمپ همداراز ویلي، اجازه نهورکوي چې ایران اټومي وسلو ته لاسرسی پیدا کړي.
هغه وویل: «غواړو چې ایران سره هوکړې ته ورسېږو، خو که د دوی مشرتابه دا رد کړه، نو اړ یو چې فشارونه ډېر کړو.»
امریکا او ایران د اټومي وسلو پروګرام په اړه څلور ځلې مخامخ خبرې کړي او هیلې دي چې دواړه لوري به یوې هوکړې ته ورسېږي.
