معاونت اقتصادی ریاست‌الوزرای امارت اسلامی، اعلام کرده که عبدالغنی برادر، معاون اقتصادی ریاست‌الوزرا، در رأس هیئتی به اوزبیکستان رفته است.

این معاونت، گفته که عبدالغنی برادر امروز (شنبه، ۴ حوت) در رأس یک هیئت عالی‌رتبه‌ی امارت اسلامی به سفر رسمی دوروزه روانه‌ی شهر تاشکند، پایتخت اوزبیکستان، شده است.

معاون اقتصادی ریاست‌الوزرا را در این سفر، هدایت‌الله بدری، سرپرست وزارت معادن و پترولیم؛ حمیدالله آخوندزاده، سرپرست وزارت ترانسپورت و هوانوردی؛ نورالدین عزیزی، سرپرست وزارت صنعت و تجارت؛ عطاءالله عمری، سرپرست وزارت زراعت، آبیاری و مالداری؛ نوراحمد آغا، سرپرست بانک مرکزی افغانستان؛ عبدالمتین سعید، معاون عواید و گمرکات وزارت مالیه و نمایندگان اداره‌های سکتوری، هم‌راهی می‌کنند.

هدف از این سفر، گفت‌وگو در باره‌ی توسعه‌ی روابط سیاسی، اقتصادی، تجارتی و ترانزیتی میان افغانستان و اوزبیکستان و جلب سرمایه‌گذاران اوزبیکستانی به بخش‌های مختلف در افغانستان است.

اوزبیکستان از جمله کشورهای همسایه‌ی افغانستان است که در بیش‌تر از سه سال گذشته روابط اقتصادی و سیاسی نزدیکی با امارت اسلامی برقرار کرده است.